ناهد سمير تكتب أنا كافر يا بلد

أنا كافر يا بلد أنا كافر ..

سهران ليلك بلا سامر …

صاحى من همى بعافر …

شقيان و الدوام من باكر .. شبعان .. جعان …

مش فاكر خلفت بنات سميت رضا و نحمده …

خلفت صبيان .. سميت حامد و شاكر …

هجرونى من غير ما اهاجر ..

فجرونى و المجتمع ساكر ..

تقولش في النيل خمر ..

و لا القانون مسطول ..

طب و ده معقول .. ؟

ده انا مينا ..

ماتعرفش الملك مينا اللي وحد القطرين ..

ده انا فرعونى ..

انا ابن أصول …

انا مش جاى مع جيش الصليبين. ..

أنا مش جاي من بين النهرين ….

أقولك ايه …

يا وطن ناكر ….

أقولك ايه ….

ده انا اكتر منكم مذاكر …

طب عينك فى عينى و قول مش فاكر…

مش انا جارك الصايم طول نهار رمضان و عازمك ع الفطار كمان مش كنا مع بعض فى الميدان …

بلاش …

ماحاربتش انا فى جيش صلاح الدين زمان …

ده انا من كتر ما اتعايشت معاك …

و حفظت غناك …

بقيت انا قبطى العرق ..

مسلم الهويه ده انا حافظ الاحاديث …

و كاتب فى التعبير عن حطين و القادسيه حفظت كام سوره انا فى منهج لغتنا العربيه … ؟

ماعملتش حاجه غصب عنى …

المعرفه نعمه و انا احب اكون ثريه طب اقولك على فكره ….

ما تقرا الكتاب اللى بقراه …

و تفهم اللى فاهماه …

بدل ما تسمع كلام علىً اقرا موعظه المسيح ع الجبل …

اقرا رسائل بولس الرسول للكنيسه الأوليه …

شوف المسيح نادى الميت بعد ما انتن …

اقولك الله يباركك احسن ..

بقا كلمة كافر دى عليً ؟!

انا افتكرتك تقصد ديانة السيخ و لا البوذية او ديانة حب السلطة و المال و اللى جاروا عليك و علىً..

الله يسامحك …..و ما يحسب عليك دى خطية

التعليقات

أخبار ذات صلة

صفحتنا على فيسبوك

آخر التغريدات