مشكلة زوجة تطلب حلا – من الانبوكس مايكل دانيال

“..رغم اني مترددة و مش عارفة ابدأ منين… بس هحكيلك مشكلتي لاني فعلا محتاجة اسمع اراء الناس فيها و فارق معايا جداً دعم الناس ليا ولو بكلمة.

انا مدام عمري 42 سنة، من مدينة خارج القاهرة.. اتجوزت من سن صغير جدا و ده يمكن علشان اهرب من مشهد ابويا وهو بيضرب امي، و من معاملته القاسية ليا.

جوزي كان بيشتغل مع والدة و كان يادوب فلوسه علي قد الاكل مش اكتر، و بعد ما والده مات، بطل شغل تقريبا و انا اللي شلت مسئوليه البيت و ٤ اطفال.
جوزي كل همه هو الجنس و بس و لو رفضت لأي سبب يضربني و يبهدلني و علي الرغم من العيشة الصعبة دي، كافحت و لما بنتي كانت في ثانوي عام و كنت في وقتها 36 سنة، حوشت مبلغ صغير جدا دخلت بيه كليه التجارة تعليم مفتوح و خلصت في ٣ سنين و اترقيت في شغلي و علمت نفسي برامج كمبيوتر كمان.

بعد فترة جوزي تعب و اضطريت اخد قرض من الشغل علشان اعمله عمليه لانه برغم اي حاجة هو ابو اولادي، و لما قام اخدت قرض مكمل علشان افتح ليه مشروع صغير جدا بس للأسف ضيع الفلوس دي علي المخدرات.
حاولت ارجع بيت ابويا بس هو بيرجع يعيط زي الاطفال و يقوللي ماتسيبينيش، غير ان والدي رافض اني اسيب جوزي و بيقوللي استحملي و عيشي.

الحمد لله بنتي الكبيرة اتجوزت و معايا حاليا الـ ٣ اولاد منهم واحد في كليه التجارة و الثاني دبلوم صناعي و الصغير ٨ سنين.
المشكلة ان ماليش حد في الدنيا حتي اتكلم معاه، و يمكن ده سبب اني كلمتك، و كمان لاني تعبت جداً
اولادي الكبار اشتغلوا في قهوة و استحملوا كتير علشان يعرفوا يشتروا حاجة لنفسهم، و ابوهم سرق منهم فلوس علشان يشرب.
و انا اشتغلت فترة في عيادة بعد الضهر بس جالي و ضربني و بهدلني فالدكتور مشاني و ده بسبب اني برجع بالليل تعبانه من شغل الصبح و شغل بعد الضهر و مش بقدر اكون معاه زي ماهو عاوز.

حقيقي مابقيتش طايقة اشوفه او انه يلمسني، و حياتي صعبه و ممكن في ايام يبقي البيت مفيهوش رغيف عيش واحد
رغم كل ده بحاول اضحك و ابان كويسة قدام الناس و انا بتقطع و يمكن دي اول مرة احكي لحد كل ده…
اتمني انك تقولي اعمل ايه لاني فعلا تعبت، و اسفه لو كنت طولت عليك”
– – – – – – – – – – – – – – – – – – – – – – – –
الرسالة دي وجعتني قوي من كمية الألم اللي فيها، و تواصلت مع صاحبتها تليفونيا و اللي وجعتني اكتر بضحكتها اللي فيها رضا و تصالح مع الظروف، و اقترحت عليها انها تنقل للقاهرة مع اولادها و تهرب من علاقة مش بس بتأذيها لكن كمان بتأذي اولادها
المشكله اننا محتاجين شغل ليها بمرتب كويس و سكن بإيجار قليل و لو فيه شغل ليها تاتي بعد الضهر هي علي اتم الاستعداد….
هي ها تتابع الكومنتات فياريت تشاركوها الرأي لو فيه اي حلول تاني متاحة، ولو حد يقدر يساعد في شغل او سكن يتواصل معايا و انا هوصله ليها او شير للبوست يمكن يوصل لحد يقدر يساعدها.

#من_الإنبوكس
.. مايكل
ملحوظة: ماتنساش تعمل لايك علي البوست كدعم للفكرة، و #شير علشان غيرك يقدر يشارك معانا.

التعليقات

أخبار ذات صلة

صفحتنا على فيسبوك

آخر التغريدات