مشكلة صيدلانية تطلب حلا – من الانبوكس مايكل دانيال

“..انا بنت بشتغل صيدلانية و عندي 38 سنة… شايفة نفسي متوسطة الجمال و مظهري كويس و دخلي و مستوايا حلو جداً الحمد لله…
طبيعي زي اي بنت نفسي البس فستان ابيض.. نفسي افرح و احب و اتحب… لي احتياجات جسدية زي اي بنت و طبيعي نفسي ابقي ام 
من زمان و بيجيلي عرسان كتير بس كنت برفض، يمكن لاني كنت عاوزة دكتور رغم اني بدأت اشوف دلوقتي ان ده كان غلط، بس ده اللي حصل و مش بإيدي اني ارجع بالزمن!

يمكن جزء من مشكلتي هما اهلي لانهم متزمتين معايا جداً في الخروج و مفيش تأخير عن 9 بالليل حتي في عز الصيف، و مفيش اصحاب… مش عاوزة اعمل حاجة غلط علشان ماحدش يفهم ده، لكن تعبت بسبب الكبت و التزمت الزائد عن الحد خصوصاً اني مش صغيرة 

من فترة قريبة اتعرفت علي شاب مؤهلة و مستواه اقل بكتير و دخلة لا يزيد عن 1500 جنية و انا دخلي اكتر من 10 اضعاف ، و هو اصغر مني بـ 7 سنين كاملة
ارتبطنا لانه كان عاوز كده، و كنت انا اللي هجيب الشقة و افرشها و افتح ليه مشروع صغير علشان ما يحسش قدامي ان دخله قليل 
المشكلة اني بدأت احس انه عاوز يصاحبني اكتر من انه يتجوز، و كان احيانا يطلب مكالمات بشكل فيه ايحاءات جنسية و كنت برفض تماما، و الاهم بدأت اشوف انه انسان مادي جداً و لما اختبرته بفكرة اني هساعد اختي الصعيرة في جوازها بمبلغ صغير هو رفض ده تماماً !!
و دي كانت القشة اللي كسرت الجزء الصغير اللي كان باقي في العلاقة، و رفضت الموضوع بعدها تماما…
بكتب الكلام ده و انا بسأل … هو انا هتجوز و هلاقي حد كويس يحترمني و يحبني ؟
هو فعلاً ده ممكن يحصل في يوم؟
حقيقي بقي عندي يأس فظيع و حتي لما اتنازلت تقريباً عن كامل حقوقي لمجرد اني الاقي رفيق لي في مشواري، طلع شخص طماع جداً … المفروض اعمل ايه؟!”
– – – – – – – – – – – – – – – – –
للبنت دي عاوز اقولها…
انتي فعلاً شجاعة لأنك قدرتي تحسمي امورك و تتخلصي من علاقة مُرهقة كانت ها تستنزف منك و من مشاعرك اكتر جداً من اللي ها تاخديه 
انتي قوية لانك قدرتي تشوفي كل ده في وسط زحمة احتياجك للجواز و العلاقة و الخلفة 
و هقولك استني لحد لما تلاقي فرحتك الحقيقية لان الضحكة مش بالساهل، و الفرحة الحقيقية مش بسهولة نلاقيها… بس فعلاً تستاهل نتعب علشان نوصلها 😍😍

* ياريت تشاركونا برأيكم و دعمكم لصاحبة المشكلة ، ولو عندك مشكلة ياريت تبعتهالي في رسالة و هنشرها 
#من_الإنبوكس
.. مايكل
ملحوظة : ماتنسوش تعملوا لايك علي البوست، و منشن لأصحابكم كدعم للفكرة 
#الشير متاح جداً 

التعليقات

أخبار ذات صلة

صفحتنا على فيسبوك

آخر التغريدات