تفاصيل مبكية تنشر لأول مرة حول مقتل الصيدلى المصرى “مات الولد راح السند “.

 نشر أحد المصريين بالخارج قصة الصيدلى المصرى  الذى تم قتله  مساء أمس بالسعودية قائلا  

القصة و ما فيها

احمد طه حسن… صيدلي متخرج من كلية صيدلة جامعة القاهرة ٢٠١٢بتقدير عالي

احمد ولد وحيد لابوه وامه و له اخت

احمد اشتغل في صيدليات مصر كتير و لكن لما لقي الدخل قليل و مش هيحققله اللي هو عايزه انه يجيب شقة يتجوز فيها و يوفر مبلغ عشان تكاليف الزواج…. فقرر ان يسافر يشتغل بره مصر

خرج احمد من اكتر من خمس سنين للعمل في مجموعة صيدليات النهدي بالسعودية

احمد كان بيشتغل الصبح في صيدلية و بالليل في صيدلية عشان يقصر فترة تواجده  بالسعودية و يرجع يعيش وسط أهله

احمد حرم نفسه من كل متع الدنيا عشان يحقق حلمه

احمد طول عمره ما غلط فى حد ولا عمره شرب سيجارة ولا مشي مع بنت و ولا عمره كان له اعداء.

 

و هو شغال فالصيدلية جاله واحد عايز يرجع علبة بامبرز فاحمد طلب منه فاتورة الشراء….. و لكن ازاي عبد مصري يطلب من سيدة السعودي الفاتورة

فقرر السعودي انه يشتمه بأهله وأمه … سباب متواصل بدون توقف… و قرر انه يعتدي عليه بالضرب…. فأحمد دفاعا عن نفسه ضربه في وشه…. و الناس تدخلت.. و احمد رجعله البامبرز رغم ان ذلك مخالف لقوانين الصيدليه… عمل كده عشان يبعد عن المشاكل و عشان يأكل عيش في سلام… و يحوش المبلغ اللي هو عايزه و يغور من البلد دي

تفتكر الحوار خلص علي كده!!!!!؟؟؟؟؟……

السعودي شاف انه لما اتضرب …. كأنه حد هتك عرضه فقرر انه لازم يأخذ حياة احمد عقابا ليه عشان عنده كرامه و مرضيش انه يتشتم و يتضرب

تاني يوم جاله هو و واحد معاه ركنوا العربية امام الصيدلية….. و بصوا شافوا احمد واقف فالصيدلية

و عشان هما كلاب و جبناء مقدروش يواجهوا احمد فوشه…. عشان ممكن يدافع عن نفسه تاني…. فدخلوا من الجنب من حته مخفيه و استنوا احمد لما ينشغل مع مريض و مركز في الكمبيوتر ……. فانقض عليه و طعنه في القلب و نط فوقيه و قعد يطعن فيه و يتأكد من موته قبل تركه….. و يتأكد من استحالة انقاذه….

السؤال هنا….. انت معاك سلاح…. ليه مدخلتلهوش من الوش زي الرجالة؟؟؟؟!!!!… هل ضربة الوجه دي تستحق انك تعاقب حد عليها انك تموته؟؟؟؟؟

انت شايف نفسك آله عشان تقرر انك تنهي حياة واحد بدون ما تعرف ظروفه ولا سبب غربته؟؟؟؟!!!

تفتكر أمه و أبوه و اخته حياتهم اللي جاية هتبقي عاملة ازاي و هو كان سندهم الوحيد فالدنيا بعد ربنا؟؟؟

انت تعرف ان أحمد كان بيساعد أهله و اخته لتجهيزها للزواج؟؟؟ … انت تعرف أن احمد كان حارم نفسه من كل متع الدنيا عشان ينزل يقعد جنب أبوه المريض؟؟؟؟؟؟ و مات قبل ما يتجوز او يشتري الشقة اللي كان بيحلم بيها؟؟؟

 

احمد اتقتل غدر…. و بسبب تافه… و اتعذب في التشريح…. و لسه هيتعذب تاني عشان التحقيقات تأخذ مجراها قبل ما يوافقوا أنهم ينزلوه مصر

المتوقع انهم مش هيخلصوا قبل اسبوعين و ثلاثة…..

 

كل اللي اهله عايزينه انه ينزل بسرعة مصر و كفاية عذاب فيه….. كل اللي عايزينة انه يندفن في مصر جنبهم عشان يقدروا يزوروه…. كل احلامهم دلوقتي انهم يخففوا عنه العذاب في الثلاجات و التشريح….. كل اللي عايزينه انهم يدفنوه عشان يقابل رب كريم….. كل حلمهم انه يروح لمنزلته في الجنه مع النبيين و الصديقين و الشهداء و الصالحين…..

 

ربنا يغفر له و يتقبله مع الشهداء و ينتقم من اللي قتله و من اللي ساعده اللي كان راكب معاه العربية

 

تحرير

التعليقات

أخبار ذات صلة

صفحتنا على فيسبوك

آخر التغريدات