( مجدى يعقوب مش ملعون )

مجدى يعقوب مش ملعون

شبعنا تخاريف كفاية جنون

يا عاصم أنت أيه سلطانك

لا أنت داين ولا هو مديون

يا عاصم أنت ما إلا أنسان

لا أنت أله ولا حتى ديان

مالك أنت و مال غيرك

المحبة و الرحمة هما الأيمان

أنت عارف مين مجدى يعقوب

ملك الأنسانية و ملك القلوب

سفير المحبة و رجل السلام

أسمه مع العظماء مكتوب

مجدى و الله مالوهش مثيل

مصرى وطنى شرب من النيل

رافع أسم بلدنا تملى

عمره ما فكر بيها مرة يميل

ليه التجريح و ليه الأهانة

مالك أنت و مالك الديانة

الدين لله و الوطن للجميع

خليك حقانى الكلمة أمانة

يا عاصم الحكاية مش تحدى

جرب تكون أنسان زى مجدى

كفاية سب و لعن و تكفير

يا عاصم بالمركب اللى توودى

مجدى يعقوب ده ملاك

لا يعرف كره ولا هلاك

يا عاصم ربنا يهديك

أمين يكون معاك

مجدى يعقوب ده أسطورة

بيمثل مصر بأعظم صورة

قامة و قيمة و علم و مكانة

بأمثاله مصر دايما منصورة

كلمات : محمد فتحى

التعليقات

أخبار ذات صلة

صفحتنا على فيسبوك

آخر التغريدات