وائل فؤاد يكتب .. أشمعنى انا

الدكتور وائل فؤاد
 خاطرة للكاتب الدكتور وائل فؤاد
اشمعني انا يا ابني اللي المفروض اقبلك وانت مهمل في حقي ؟ اشمعني انا يا ابني اللي المفروض اقبل تقصيرك في شغلك ؟ اشمعني انا يا ابني اللي المفروض اقبل اني اشوفك بتظلم اللي بيموتوا علشان يحموك ؟ اشمعني انا يا ابني اللي المفروض اقبل انك تسيبني وانا ضعيفة ومحتاجة ليك تقومني علي حيلي ؟ اشمعني انا يا ابني اللي المفروض اديلك مهما كانت ظروفي بسبب أعمالك ؟ اشمعني انا يا ابني اللي المفروض اوفر ليك رفاهية في أصعب الظروف والا ابقي وحشه ؟ اشمعني يا ابني انا اللي مفروض اتحمل الضغوط من تجار القمح وانت بترمي العيش في الأرض اشمعني انا يا ابني اللي المفروض علي مزعلكش مهما كانت تصرفاتك بدل ما اعلمك تتصرف صح اشمعني انا يا ابني اللي المفروض اطبطب عليك في كسلك وانت مش مستحمل أي تقصير ؟ اشمعني انا يا ابني اللي المفروض اتحمل ديون وجمايل علشان ابني مصانع وانت مش عاوز تتحمل ساعات شغل زيادة ؟ اشمعني انا يا ابني اللي المفروض أخطط وانظم وارتب لكن انت مقضيها قرارات بدون تفكير في القرار ولا نتايجه ؟ اشمعني انا يا ابني اللي المفروض اني احقق ليك مستوي الدول المتقدمة وانت مصر جدا تتصرف معاي بأسلوب علي اد فلوسهم ؟ اشمعني انا يا ابني اللي المفروض اخلي بالي في تصرفاتي وكلامي وانت علي السوشيال ميديا بتقول أي حاجه في أي وقت علي أي حاجه ؟ اشمعني انا يا ابني اللي لازم اكون حلوة ومكفياك في كل حاجه وانت متعود تقطع كراسي الاتوبيس وتجرح العربيات وترمي زبالتك في الشارع وتبقي بتضحك وانا بعيط علي حاجاتك اللي بتبوظها؟ اشمعني انا يا ابني اللي لازم اضحك في وشك وانت بتصحي كل يوم بتشتم في وبتهيني وبتسبني وبتندم علي انك عايش علي ارضي ؟

التعليقات

أخبار ذات صلة

صفحتنا على فيسبوك

آخر التغريدات