إحساس انك دخلت في علاقة و اتسابت إحساس مؤلم جدا أغلبنا مر بيه؛ أنا مش هاتكلم عنه كتير لأنك فاهمه أكتر مني أنا هاخش في الموضوع على طول:
- متحاولش ترتبط بسرعة؛ ده تعويض عشان حاسس دلوقتي انك قليل. خد بالك إنت كدة بتظلم نفسك وبتظلم اللي بترتبط بيه.
- في حاجة اسمها Anchoring يعني رابط بيخليني اربط إحساس معين بموقف معين؛ زي مثلاً احساسك لما تسمع أغنية بتفكرك بحاجة حصلت من 5 سنين.
المشكلة عشان ننسى بنحاول مانسمعش الاغاني اللي سمعناها مع بعض ونروح الاماكن اللي روحناها مع بعض. ده بقي هيتعبك أكتر الحل انك تروح الاماكن دي وتسمع الاغاني دي عادي عشان تتربط باحداث جديدة جواك.
- إحساس الذنب اللي بيستنفذك ده ماتسمعيلوش كتير. طول الوقت عمالة تقولي لنفسك “أكيد أنا غلطانة عشان كدة هو مشى وسابني”. فيه ناس كانت هتمشي سواء غلطي أو مغلطيش.
- مش معنى إن حد مشى يبقى قراره صح، والدليل إن في ناس كتير بتمشي وبتحاول ترجع تاني. ماتخافش إنت مش قليل.
- بصي بقى أهو الفيسبوك ده هو اللي هيموتك. إقفليه خالص ده بروفايل مش أكتر. الشخص نفسه مشى خلاص وانتي قاعدة بتتعبي في نفسك.
- إخرج مع صحابك كتير، التواصل هيزود قدرتك علي الشفاء. وماتسيبيش صحباتك يقعدوا يشتموا فيه عشان يساعدوكي تنسيه. ده مش هيخليكي تنسيه ده هيخليكي تفكري فيه أكتر.
- مفيش حاجة اسمها The one. هي مش واحدة ربنا إخترهالك وانت ضيعتها زي ما إنت فاكر. الحاجة اللي من ربنا بتقعد مبتمشيش.
- مفيش حاجة اسمها تسانديه وتبقوا صحاب. انتي عارفة انك بتحوري على نفسك وصحابك عارفين وهو عارف ومصر كلها عارفة.
- المقارنة اللاوعية شيء طبيعي في العلاقة اللي جاية بذات في أولها. لو المقارنة قلت مع الوقت يبقى إنت في علاقة صحية لكن لو ماقلتش مع الوقت من الامانة انك تنسحب فوراً وتاخد وقت للشفاء من العلاقة اللي فاتت.
- مش معنى إن الحد ده راح لحد تاني، يعني الحد التاني أحسن منك. عملية الانجذاب معقدة ولها علاقة بالطفولة وده اللي هنتكلم فيه بالتفصيل في المقالة الجاية.
