مايكل سامى يكتب كلمتيه

كلمتيه ؟؟
قولتيله انك بتحبيه ؟؟
قولتيله انك صاحية ونايمه
بتحلمي بيه
قولتيله انك بنت , وطبع البنت
مايتكلمش
وان سكوته بيجرح قلبك
وازاي يعني ميتألمش
فهمتيه ؟
فهمتيه انك بني ادمه
جواكي شوق ومشاعر ليه
وان كان قادر يخفي شعوره
قلبك مش قادر يخفيه
ذنبك ايه ؟؟
ذنبك ايه انك انسانه
محكومه ب حبة تقاليد
وانك لازم تفضلي ساكته
مهما الشوق ف القلب يقيد
ها طب قولي
رد بأيه ؟؟
قال زي اخته !!
ياختي عليه
بالرغم انه تملي يلاغي
ليل ونهار يفتح مواضيع
يطمن يوميا عنك
ورصيده ف مكالمة يضيع
جاب ورا لما لقاكي خفيفه !!
اصلا وانتي قوية وجامده
كان فاكرك تمثال ف حياته
مش حاسس انك بني ادمه
فيها ايه لما البنت تحب
وتصارح باللي ف مشاعرها
من غير مايقولوا مش محترمه
ولا حدش يفضل يعايرها
هل ده طابع شرقي عقيم
عامل البنت مجرد ألة
ولا يكونشي شبابنا الحلو
مبقاش فيه مابينهم رجاله !!
بصي يابنتي خلاصة القول
ربنا وحده هيتولاكي
وسعادتك مش ممكن تكمل
غير لو تنسي اللي بينساكي
وعشان دي عادتنا وتقاليدنا
ادفني حبك جوه ضلوعك
مافي راجل في الدنيا بحالها
يستاهل تنزله دموعك ..