عارف أول مرة شفتها فيها، وحسيت انك مشدود قوي، ولقيت ضربات قلبك زادت، وبدا عليك بعض علامات البلاهة وصوتك مرة وحدة بقى واطي، ودخلت في مرحلة علميا بيسموها ال Infatuation أو “النحنحة” ؛ طبعاً دي مرحلة جميلة جداً جداً ، بس عايز أقولك إن سببها شوية chemicals في المخ زي الDopamine وشوية هرمونات ذي الOxytocin (هرمون الثقة والحضن هنتكلم عنهم بالتفصيل في مرة تانية).
مرحلة النحنحة دي مش كافية تماماً لوحدها للحب لأنها بتاخد من ست اسابيع ل١٨ شهر على أقصى تقدير، إيه ده يعني أنا ممكن أكون في مرحلة النحنحة دي ومش عارف؟ ، طب أعمل إيه ؟
ورقة وقلم معايا يا ست الكل (بصوت الشيف الشربيني) وهنمشي شوية إختبارات نعرف منها اللي أنا فيه ده حب ولا نحنحة:
أول إختبار هو “التعامل” ، لأ طبعاً مش قصدي تعاملها معاك ولا تعاملك معاها، دي كلها شوية Psychological Masks انتوا الاتنين لابسنها غصب عنكم، بتخلي كل واحد فينا يطلع أحسن ما عنده، دي بقى “فاكس” تماماً لأنها هتروح مع الوقت. أنا قصدي على تعاملها مع أهلها وصحابها ، خدي بالك من تعاملاته مع أمه وزمايله في الشغل، دي المحك الاساسي. سيبك من انكم تعدوا لوحدكم مع بعض طول الوقت، ده بيزود تأثير الChemicals، اقعدوا وسط الناس هتعرفوا بعض أكتر.
نقطة مهمة جداً هي” الخلاف”: الحب بيخليك تحل الخلاف ولو في مشكلة تواجهها ، لكن لو إنجذاب وقت الخلاف مش هتواجه، هتهرب. هل وقت الخلاف احنا مع بعض ولا ضد بعض؟
الحب بيخليك تكبر وتنجح أكتر في شغلك وحياتك، لكن الإنجذاب والنحنحة من غير حب بتخليك تتأخر، عمال تفكر طول الوقت وقلقان ، الحب بيخلي جواك سلام مش قلق ودوشة في دماغك طول الوقت.
خد بالك من اللي جاية عشان مهمة جداً “الإنجذاب الجسدي” : مهم جداً إن يكون فيه بينكم قبول، وتكون قادر تنجذب ليها وقادرة تنجذب ليك، بس الاهم مايكونش ده محور العلاقة. التلامس المبكر هيخليكم متعرفوش بعض أصلاً، هيخلي التركيز كله على الجنس والهرمونات هتشتغل لوحدها ودي بداية الوجع. واوعي تفتكري انك بكدة بتحافظي على وجوده ، إطلاقاً هيمشي ولو مش دلوقتي بعض ما الكيميا تخف شغلها شوية.
الحب بيحتاج وقت، لكن النحنحة بتنفجر في لحظة. سيب الحب ينمو جواك واحدة واحدة وماتستعجلهوش.
التفرد: هل بتحبها هي بس، أقولك على سر: لو قارنتها بواحدة تانية كل شوية، حتى لو كانت بتبكسب المقارنة تبقى لسة مابتحبهاش.
الحوار: هل ينفع حببتك تبقى صديقتك؟ يعني يبقى في بينا حوار وأهداف مشتركة أو حتى متقاربة؟ ممكن كلامنا لوحده يبقى مشبع؟
المعرفة نقطة فاصلة في الموضوع: هل أعرف الشخص كويس ولا مشدود لصفة معينة فيه بس ؟
المسافة: في الحب بينفع نسيب مسافة، وبينفع ناخد وقت كل واحد يبقى لواحده، لكن في النحنحة والانجذاب مانقدرش، لازم نبقى مع بعض طول الوقت وبنكلم بعض طول الوقت عشان الكيميا تفضل شغالة.
راجع النقط كويس وشوف اللي أنا فيه حب ولا إنجذاب والمرة الجاية هندخل التستوستيرون في الموضوع وما ادراك بال testosterone وعمايله !
