بقلم هشام بدوى الدسوقى
ركزوا فى السياحة اللى بتجيى من شرق آسيا شعوب الدول دى حلمها الكبير يزوروا مصر وبيدفعوا كتير ومصر بالنسبه لهم حاجة جديدة ومايعرفوش عنها حاجة بيعرفوها بس من التلفزيون والنت والله لو ركزنا مع السياحة الصينية ,واليابانية مش هنحتاج حاجة تانى اعملوا مؤتمرات هناك ابعتوا مرشدين سياحين بيتكلموا يابانى وصينى للبلاد دى هيعرفوا يسوقوا صح وهيجيبوا للبلد شغل كتير بس بلاش والنبى الله يكرمكم تبعتوا الفشلة بتوع وزارة السياحة وهيئة تنشيط السياحة اللى بيسافروا علشان يعملوا شوبنج ويأخدوا البلد وفى الآخر يكتبوا يافطة الدعاية بالألمانى تعالوا زوروا مصر عليكم اللعنه وكدة ابعتوا المختصين اللى فاهمين طبيعه الشعوب دى وبيعروفوا يتعاملوا معاهم اعملوا دعاية هناك اعملوا قنوات فضائية فى الأقمار الصناعية اليابانية والصينية بتتكلم لغتهم ويكون طبعا لغة التحدث للعاملين فى القناه الصينى واليابانى اوعوا تعملوا قنوات للصينين على النايل سات مش هيشوفوها والله جربوا مرة تعملوا دعاية للسياحة صح جربوا مثلا تعملوا اسبوع السياحة المصرى فى اى دولة من دول وبلاش ترخصوا الأسعار الله يستركم ده سوق كبير ومفتوح جربوا تعملوا ماتش كورة فى الصين واليابان ولازم يسافر وفد من المرشدين السياحين اللى بيتكلموا صينى ويابانى اعملوا شركات سياحة هناك طوروا من خدمات مصر للطيران خفضوا الاسعار شوية بتاعه التذاكر اعطوا شركات السياحة مزايا كتيرة اعملوا شارتر من بكين وطوكيو للقاهرة والأقصر واسوان وشرم الشيخ والغردقة عيب اوى لما يجيلنا السياح الصينين واليابانيين عن طريق الدوحة يعنى قطر عيب جدا على فكرة وحاجة تقهر اعملوا اتفاقيات مع وزارة السياحة هناك وتانى بلاش موظفين الشوبنج يسافروا اعملوا دعاية فى محطات المترو والمطارات والشوارع الصين تعدادها 1.338 مليار نسمة ياخوانا اليابان تعدادها السكانى 127 مليون نسمة ( على فكرة ده تعداد سنة 2013 ) تخيل دلوقتى بقوا كام اعملوا تيشرتات وصدروها للصين واليابان مكتوب عليها باليابانى ( エジプトへようこそ ) وبالصينى ( 歡迎埃及 ) دى ترجمة جوجل ومعناها مرحبا بكم فى مصر اعملوا مجات شاى اعملوا مجلات تعريفية بمصر وابرز الاماكن السياحية فيها اعملوا اتفاقية مع وزارة التعليم هناك اعملوا اتفاقيات مع الشوارع اعملوا اعلانات على الاتوبيسات هناك والله ممكن حاجات كتيرة تتعمل بس اللى يفكر واللى بيحب البلد فعلا اعملوا بدل ماتسرقوا فلوس البلد وفى الآخر تطلبوا الشعب انه يمسى ويصبح على مصر اصرفوا الفلوس دى فى حاجات مفيدة تنفع البلد الموضوع بسيط والله هو مكلف بس هيجيبلك خير كتير وعايز ناس بتحب مصر فعلا ،عايز ناس عايزة الخير للبلد مش عايزة تهاجم وتنتقد كل اللى يقول شىء خلاف النظام القائم وخلاص فكروا وقرروا وهاتوا المختصين هاتوا الناس اللى اتعاملت مع الشعوب دى واستغلوها وتانى برضه هتصرفوا كتير بس هتكسبوا اكتر
نقلا عن الأهرام الكندى
