ناشدت ريموندة ابراهيم اخت المحبوس رومانى ابراهيم سمير من خلال موقع المواطنة نيوز السيد الرئيس المحبوب عبد الفتاح السيسى بالتدخل لانقاذ شباب مشجعى فريق الزمالك من السجن والمحبوسين حاليا ومنهم اخوها رومانى ، وانقاذ مستقبلهم ، حيث انهم شباب يشجعون فريق الزمالك الكروى ،قائله :
سياده الرئيس اخويا رومانى ابراهيم سمير كان بيتفرج على ماتش الزمالك وفريق طربلس ليبى منذ 23 يوم وتم القبض عليه عشوائى واتهموه بالانضمام للالتراس والتعدى على ممتلكات عامه فى استاد برج العرب وتم التحقيق معاهم بداخل مديرية الامن بسموحه واعطاءهم 4 يام ثم تحويله لنيابه الدخيله جنح العامريه 2 فى وسط حراسه مشدده وانهيار الاهالى ، ثم امر بالتجديد 15يوم ثم تجديد اخر 15 يوم و ثم القاضى اعطاهم اخلاء سبيل وجاءت اوامر اثناء الجلسه بعدم اخلاء سبيلهم ، وفوجئنا بتحويل القضيه للقضاء العسكرى برقم 185جنح عسكريه بمحكمه ثروت بالاسكندريه وتحديد جلسه بتاريخ 8/8 جلسة تجديد وليس حكم يعنى اخويا وباقى اللى معاه هيتجددلهم 45 يوم ..
اخويا طالب بمعهد تبريد وتكييف وهو العائل والذى ينفق على الاسره لان والدى مريض و رومانى بينفق على علاجه ومتطلبات المنزل .
اخويا وكل اللى معاه محبوسين ظلم باوامر من مرتضى منصور ومش عايز يسيبهم مع العلم انه رفع الحذاء فى وجههم اثناء الماتش وده المفروض رئيس نادى وقدوه يضيع مستقبل الاولاد مع انهم لا يوجد اى ادانه ليهم 235 مشجع منهم اطفال بخلاف بهدله الاهالى وراء اولادهم وتعبنا ومفيش اى تعاون مع الموقف ..
يا سياده الريس حضرتك قولت اننا نور عينيك بس للاسف نور عنيك وشباب زى الفل وناجح فى دراسته و زهور البلد محبوسين ظلم فى مركز شرطة سموحه بالاسكندريه .
مع العلم اوكد لك اننى من محبينك سياده الرئيس و ممن انتخبوك وممن نزلوا لتفويضك وانى على ثقه من عدم رضاءك بالظلم ولا بحبس اولادك على تهمه لم يرتكبوها .
ارحم اولادنا وبهدله الاهالى من سفر ومصاريف واحتراق قلوبهم على ابناءهم .
ارجو من سياتك انقاذ الشباب ومساعدتهم على البراءه أو العفو عن الشباب المظلومه 235 اسره منهاره .
شكرا سيادة الرئيس
