طيب وبعدين ..

أظن كدا واضح جدا كل ما تحصل حالة لبس أو هوجة اعتراض في الشارع المصري بسبب أراء أو فتاوي بعض الشيوخ الأجلاء نلاقيهم في موقف لا يحسد عليه لأنهم بيقعوا ما بين مجتمع تنويري علماني رافض تماما وبيحارب فكرهم السلفي الهابط وما بين عدم قدرتهم ورفضهم للتراجع عن أفكارهم الغليظة

طيب الحل إيه علشان نخرج من الورطة دي ونقدر نسيطر على الناس ونلزمهم بفكرة الحجاب اللي هي مشكلة المشاكل وكمان ودا الأهم علشان نحافظ على هيبتنا وشكلنا أدام الشعب الكتير اللي بدأ مايخافش ويدرك ويفهم ويبحث ويتحقق وصوته يعلى ويعترض ويجادل بالحجة

يبقى ما فيش غير إننا نلجأ لطرف آخر مشهود له بالصدق وحسن السمعة حتى لو مش طايقينه ومالوش علاقة بالموضوع أساسا ونستشهد بكلامه لحتى يدعم موقفنا .. دا اللي حصل ياسادة

طلع الشيخ المبجل أحمد كريمة يتصريح لطيف شبه بتاع الجندي كدا وهو مستميت يقنع الناس بالحجاب فقال أن الحجاب فرض في الإسلام واليهودية ( و ماله .دا مايخصناش خالص ) وإن كمان اللاهوتيبن المسيحيين

( ليه هو فيه لاهوتيبن مسلمين أو وثنيين مثلا ) بيشوفوا أن الحجاب دليل حكمة

دا فين دا ياشيخ ؟ وفي أي كتاب من كتب اللاهوت اللي حضرتك قريتها جاب سيرة الحجاب من بعيد أو قريب وحضوا عليه كمان ؟! ومين اللاهوتيين دول اللي استخلصت من كتبهم تصريحك دا

علشان نعرف إحنا كمان .. طيب هو حضرتك كشيخ عارف يعني اللاهوتيين دول بيتكلموا في إيه بالظبط

وإيه دخل اللاهوت واللاهوتيين في قصة الحجاب .. ؟! بالظبط زي اللي في موقف محرج راح يحط في كلامه أي كلمة انجليزي وغلط كمان تقوم الناس الطيبة تنبهر به باعتباره بيقول كلام كبير شكله مهم ويمشوا وراه

طيب وايه دليل الحكمة دا ياشيخ لما كل التعليم المسيحي لا يعرف الحجاب أصلا ولا فيه أي فروض على الاطلاق حتى تبعية السيد المسيح اللي له كل السجود اختيارية تماما

فكون المرأة المسيحية بتغطي شعرها وقت الصلاة أو التنبؤ دا لأنه لا يليق تكون المرأة بتاج رأسها اللي هو شعرها في حضرة ملك الملوك .

ماينفعش طبعا مستحيل تقول مصدر النص الكتابي اللي استشهدت بيه لأنه أولا منقول عن أي حد أو أي موقع سلفي ..

ثانيا كدا بتقلب الترابيزة عليك كشيخ وكمؤسسة .. طيب الآية دي هدية مني لك وَأَمَّا الْمَرْأَةُ إِنْ كَانَتْ تُرْخِي شَعْرَهَا فَهُوَ مَجْدٌ لَهَا، لأَنَّ الشَّعْرَ قَدْ أُعْطِيَ لَهَا عِوَضَ بُرْقُعٍ.” (1 كو 11: 15). “كو “دي يعني كورونثوس ..

ماتتخضش بشويش وعلى مهلك .. وبعدين يا شيخنا هو كتاب المسيحيين دا مش محرف حسب معتقدك ..

بالتالي أتباعه بما فيهم اللاهوتيين كلهم كدابين ومخداعين واللي بتطلق عليهم حسب معتقدك برضه لفظ كفرة

طيب أزاي تستشهد بآيات من الإنجيل وتاخد برأي ناس انت مؤمن إن أنجيلهم وعلومهم اللاهوتية محرفة أصلا وليه ماقولتش اللاهوتين الكفرة ولا الضرورات تبيح المحظورات .؟!

دا فاضل نلاقي فجأة السيد المسيح قال طوبى للمحجبات لأنهم أي باتنجان

ولا مثلا الصلاة الربانية بتبدأ بالفاتحة .. مش كدا ياجماعة بجد .

صحيح الموقف محرج فعلا بس إهدوا شوية وافتوا في اللي تعرفوه

بلاش تبقوا محل سخرية ..طيب شفتوا مرة طلع أي مسيحي يستشهد بغير كتابه ؟! ماتزعلش ياشيخنا ..

حضرتك للأسف جيت تكحلها عميتها خالص وكل ما تحاولوا تخرجوا من نقرة تتزحلقوا في دحديرة مالهاش مطلع دا تضليل لكل الطيبين وتعتيرهم أكتر لما اقنعتوهم بالكذب بتحريف الكتاب

بس خللي بالكم الناس فعلا بدأت تشك وتسأل وتفتش ولأنهم عطشانين أوي أوي فطبيعي هايدخلوا المواقع ويفتشوا بنفسهم في الكتاب المقدس مش في الحجاب خالص

ودي بقا مش سكتك خالص.. وكدا شكرا عملت اللي عليك ..

حاجة تانية الشيخ عبد الله نصر له كل الاحترام كتب يقول ” لم يقل السيد المسيح إن أعثرتك إمرأة إنما قال إن اعثرتك عينك ..العثرة من جواك مش من براك ” دا صحيح و جميل جدا .. .ماهو لازم حل للكارثة اللي مالهاش حل في تراثك

فالجرأة المتكررة بالاستنجاد بتعاليم يسوع المسيح وكأن السيد المسيح له المجد واحد من الصحابة دا بيضلل وبيعثر أكتر لأنك بتستشهد من بتعاليم أنت شايفها محرفة وعاوز الناس تصدقك إزاي ..؟!

بجد حرام عليكوا عموما لكم كل العذر وكله يعمل للخير ودمتم بخير

نقلا عن الأهرام الكندية