اشتقت لدمعة حنية ..

بقلم / أمل فرج

حقيقي وفعلا الحنية بتبكيني ..
والقسوة بكت قلبي وعيني..

بس دموع الحنان أفراح ..
ودموع القسوة عذاب وجراح ..

وفي عز الجرح تسقيني ..
جرح تاني بدل ما تداويني ..

قلتلها يا دنيا نفسي أرتاح ..
قالت طبعي كفاح في كفاح ..

قلتلها يوم لله تسيبيني ..
قالت والله كان على عيني ..

طب يوم فرح توريني ..
وبرحمة شوية تخليني ..

أشوف بعيني نور الصباح ..
وأحس مرة بطعم النجاح ..

ردت بقسوة عليّا..
الرحمة مش طبعي يا بنيّة ..
ولا المكتوب كان بإيديّه ..

واتعلمي ما تفاجئكيش الدنيا ..
وتوقعي الغدر في ثانية ..

طبع الدنيا طبع البني آدمين ..
تقولك شمال وهيّ رايحة يمين ..

وتقول يمين وتيجي شمال ..
والقسوة كما صخر الجبال ..
الحلم مات والحمل مال ..

مافي جدع يطلع جدع ..
يشيل عن الكتف اللي اتخلع ..
آه من زمن علم القلب الوجع ..

اشتقت فيه  لدمعة حنية ..
لكن طلعت في الآخر غبية ..
نسيت  إن طبع الدنيا القسية ..

تحرير نقلا عن الأهرام الكندية

التعليقات

أخبار ذات صلة

صفحتنا على فيسبوك

آخر التغريدات