الكاتب حسام الاسيوطى يتذكر والدة حمدى الاسيوطى

:بابا انا عايز اي كتاب عندك يساعدني اني اكتب روايه
*روايه مرة واحدة، هتفضل طول عمرك عشوائي.
:هو انا كل ما اشاركك أحلامي تحبطني
*يا ابن الكلب هو انت مش ناوي تفهم ابدا اني احبطك حاجة واني اساعدك تبقي أفضل حاجة تانية خالص.
:والله انا ما عارف انت محامي ولا فيلسوف ولا أديب ولا ناقد ولا ايه، خلصني ياعم هتجيب الكتب ولا لا.
*هطلعلك الكتب اللي ليها علاقة بالقصة القصيرة الاول وبعد ما تكتب وريني وساعتها نقرر نبدأ في الرواية ولا لا.
: تصدق انا غلطان اني دخلت البيت من بابة، طيب اوعدك انت بكرة تنزل المحكمة وانا هدخل اوضتك انكتها لحد ما اخد اللي انا عايزة وامشي 😎😎.
*اطلع برة يا ابن الكلب يا حيوان.
:😎😎 هطلع بس كام ساعة وهدخل تاني.
“بعد اليوم ما عدي وسمعت صوت الباب الحديد بيترزع الرزعه الموعودة دة طبعاً بعد طقوس الصباح اللي هي صوت فيروز العالي ودندتة وراها وهو بيسقي الزرع اللي هو زرعة بايدة وملي الفخار اكل للعصافير المنطلقة دة غير اكل القطة، خرجت من الاوضة بعد ما نزل الاقي مايقرب من ١٥ كتاب علي السفرة ليهم علاقة بكل ما يحتاجة المؤلف من ادوات وفوقيهم ورقة بخط ايدة وقلمة الحبر، ابداء فيهم زي ماهما مترتبين دة لو عايز تبقي بني ادم 😎😎.”
بعد مرور عام او اكثر اقتربت لغرفة مكتبة بمنزلنا المتواضع وكانت هناك سيمفونية ما تنتفض بالصراخ الهادي لم ادري حتي اليوم لماذا سمعت دقات قلبي وكانها موصولة بسمعات اذني.
:بابا، دي اول نسخة من با الرواية بتاعتي.
“لم اراه سعيدا كثيرا علي مدار حياتي برغم انه لا نظير له في الكوميديا، ولكن في تلك اللحظة احتضنتي سعادتة واحياتني سعادة ابتسامتة.
*يابن الكلب مبروك اشتريها منين.
:موجودة في مكتبات كتير بس انت مش هتحتاج تشتريها لان دي نسختك مين يعني يستحق اول نسخة من اول روايه ليه غيرك.
“كات اول مرة اشوف عنية مرغرة، حط الرواية علي طرف مكتبة المليان ورق وكتب وملفات وبص علي الكمبيوتر علشان يكمل مزاكرة.
*اوعدك هخلص القضية اللي في ايدي واقراها واناقشك فيها.
“وطيت علي راسه بوستها وخرجت وبمجرد ما اديتله ضهري نزلت دموعه وكانها كانت مستنية بقالها سنين اي حد فينا يلمسها.
اوقات بنحس ان اهالينا مش فاهمنا ومش مقدرين قيمتنا وعايزين طول الوقت يتحكمه فينا وبس وبنفضل عايشين في الوهم دة سنين بنخلق فيها فجوة رهيبة بينا وبينهم مع اننا لو ركزنا شوية هنلاقي انهم دايما صح اه خوفهم زيادة بس رأيهم صح دايما خصوصا اللي عاني منهم في حياته واتمرمط بيبقي بس نفسة ماتدوقش اللي داقة، والاغرب من كدة واللي هتفهمة في حياتهم دة لو انت محظوظ ان اهلك بيتمنو انك تحضنهم اكتر ما بيجي عليك وقت وميبقاش فضلك غير حضن ابوك او امك، بالنسبالي فهمت دة لما لقيت ابويا بيبكي لما حضنتة يوم ما اديتة الرواية وفهمتة اكتر لما كان في عز وجعة ومفيش علاج جايب معاه نتيجة واول ما امدد جمبة واحط راسة في حضني ينام زي البيبي في حضن امه، فضل شهور يحارب الموت في حضني، نصيحة مني ليك اوعي تسيب العلاقة بينكم وحشة واوعي تخلي الدنيا تلهيك عنهم لان حقيقي ولا لحظة هتعيشها هتقدر تحمي احساسك من اللوم والعتاب، ابشع حاله ممكن توصلها في حياتك حاله”يعني لو كنت عملت كدة، مش كان زماني مرتاح.

التعليقات

أخبار ذات صلة

صفحتنا على فيسبوك

آخر التغريدات