العالم إنتهز فرصة الثوارات والصراعات، والتدين المفرط وإلهائنا في الأخطاء الداخلية لحكومتنا، وسهانا وأخدنا مقص حرامية، وجري وسبقنا وبقى بيبصلنا من فوق بعد مكنا أسيادهم بتقدمنا، وحضارتنا وأخلاقنا ورقينا وإحترامنا لبلدنا وحبنا ليها بعد مكانت مصر حلم بالنسبالهم، وكل اللي عاوز يبقى قامة ومحترم ويبحث عن الشهرة؛ كان يجي يعيش فيها بعد مكانت القاهرة أجمل مدن العالم فعليا ملوك العالم كانوا يتمنوا رضا مصر عليهم والفكرة مكنتش فقر وغنى أو لأننا أغني بلد في العالم لكن لأننا كنا محترمين أوي يا أخي ولينا قيمة على فكرة دي حقائق تاريخية مش أي كلام بس متشغلشوش بالكم إنتوا كلها شكليات ويللا كملوا اللي بتعملوه، وبلغوا إن بناتكم إتخطفت، حاول وجاهد في إثبات أنها مراحتش بمزاجها حتى لو بأخبار كاذبة تهدم وطن وشعب حاول تثبت أن دينك هو دين الله على الأرض، ومن يدين بغيره فهو كافر، وأن طائفتك هي الطائفة الأم والباقي هرطقة، الجواز والطلاق وعلة الزنا وسر الزيجة والحلال والحرام، ومثنى وثلاث ورباع وما ملكت يا ابن المحظوظة، وركز وأنت بتحسب الحسنة اللي بعشرة أمثالها لحسن تغلط في العد ويروح عليك الثواب وإن المرأة ناقصة عقل ودين أه ومتنساش تصوم الستة البيض علشان ربنا هينسى صيامك لشهر رمضان كله وهيتلككلك على ال 6 دول وهيوديك النار، وكمان صيام الرسل وصيام العدرا وصيام يونان والصيام الكبير وصيام الميلاد وصيام الاربع والجمعة……..الخ ومتتناوليش ومتصوميش وأنت عندك ال period علشان حرااام هتروحي جهنم وحذاري تمسك كتاب ربنا من غير وضوء إدخل الحمام برجلك اليمين، وبلاش ذكر اسم الله وأنت جوه وأوعى ترمي الشنطة على الأرض علشان فيها كتاب دين وكل بأيديك اليمين لحسن الشيطان يأكل معاك وركز أوي في المسيحيين اللي بيبوسوا بعض في الكنيسة، وأنت أصلا هتموت وتعمل زيهم، وأكد إنهم معفنين وريحتهم وحشة ومش بيستحموا لأنهم “كفرة” وكمان عندهم أسلحة في كنائسهم وبيعبدوا ثلاثة ألهه واستشير مولانا في إنك تهنيهم في أعيادهم ولا حرام؟ ادخل عشة الفراخ ودور على البيضة اللي عليها اسم الله أصل البيض دليل وجوده. إملى الدنيا صراخ وعويل علشان حقك مهضوم، وحكومتك مش بتعين مسيحيين في مراكز قيادية وإتحاد الكرة مبيخدتش لاعيبة مسيحيين وإنك مضطهد في بلدك وبيعذبوك لأنك أقلية كأس العالم اللي خسرنا فيه، وفجأة بعد مكنا بنغني وبنشجع بلدنا، ومنتخب “الساجدين” وفخورين بمحمد صلاح إنه مصري؛ فجأة اتحولنا وبقينا بنسب ونلعن سلسافيل العيش والعيشة واللي عايشينها إتلهي أكتر في أن رئيسك يرحل علشان الغلاء وأن مبارك أيامه كانت عنب وابكي على اللبن المسكوب ومتنساش تنتقد الفساد والفاسدين والموظف اللي مبيشتغلش وأنت أولهم بترمي زبالة في الشارع وبتكسر الإشارة، وبتزوغ من الشغل علشان “تروح تصلي” خليك قاعد الفراغ هيقتلك وتفضل تنعي حظك وفقرك وقلة الحيلة وإن البلد دي جيباك ورا ودفنة قدراتك وإمكانياتك، وإنك أعظم من إنك تعيش فيها ومتنساش وحياة والدك تعمل هشتاج إرحل يا سيسي علشان صلاح الدين الأيوبي مستنيه يرحل علشان يجي هو يعدل المايلة وكمل أغنية إنك صاحب حضارة 7000 سنة، ومعتمد على إنجازات غيرك وبتنسبها لنفسك وعايش على أطلالها كل اللي أنا ذكرته ده جدير بأنه يهدم كون بحاله مش بلد كل يوم بتقع وتقف تاني، وعدد أعدائها كرمل البحر التأخر والتخلف إحنا السبب فيه، وهما نجحوا انهم يشغلونا عن الإنجاز والتقدم لأن مبقاش عندنا تصنيف ولا نسمي الأشياء بأسمائها أنا مش ضد ممارسة الطقوس الدينية، ولا أنتقد من يقومون بشعائرهم، ولكن ضد إن ده يلهينا عن التقدم. متى تدرك أن دينك وعبادتك لك وحدك وبينك وبين الله؛ تأكد أنك على الطريق الصحيح الدين دخل في السياسة وفي الكورة وكأن السجود لله فقط هو اللي هيخلينا بلد متقدمة وكلمة يارب وبدون سعي ومجهود هتخلينا نحصد المكاسب إن الله لا يضيع أجر “من أحسن عملا” ” من عرق جبينك تأكل خبزا” الدين لبناء الروح وليس لبناء الأوطان حبك لبلدك هو اللي هيخليك إنسان محترم يا أخي دعونا ندرك أن العالم يبني أمجاده على جثثنا على فشلنا؛ ينتظرون اللحظة اللي يخدونا فيها مقص حرامية.
