مايكل سامى يكتب بساطة مش تعقيد

عارف الواحد لما يكون متعود يدور علي لبس وينزل يوم واتنين وتلاته ويطلع عين اللي خلفوه وفي الأخر ميعجبوش حاجه
وبعدها بفترة يفكر ينزل اماكن جديده غير اللي متعود طول عمره يدور فيها فيقوم يشتري كل اللي نفسه فيه من اول محل .. ركز في كلمة ” من اول محل ” دي
ساعتها بيحس ان اللبس اللي اشتراه فرز تاني ومش حلو ,, ويقول يارتني كنت لفيت ودورت جايز كنت الاقي حاجه افضل
الأحساس ده للأسف وصله لأن هو مش واخد علي الراحه والسرعه دي .. هو متعود يطلع عين اهله في كل مرة يفكر ينزل يدور علي حاجه تليق بيه .. متعود علي الدوخه وقلة القيمة .. متعود علي قولت ” ااااااه ”
متعود علي ايام كتير يضيعها في الموضوع ده .. فلما الموضوع يتم في عشر دقايق ,, بيستغرب
نفس الحال للشخص المتعود انه ياخد بومبه من كل بنت يحاول يقرب ليها ويلمحلها بحبه ..
وبعد مايقرب من دي ويلف علي دي ويتعرف علي دي ويكلم دي وفي الاخر كلهم يرفضوه
وفجأة يوم مايرتاح لبنت جديده وبمجرد مايدق بابها ويلمحلها بالكلام ويلاقيها وافقت بسهوله .. اول حاجه بيقولها
انا شكلي اتسرعت ولا ايه ؟؟ غريبه اوي , دي وافقت بسرعه من غير اي تعقيدات ,, يكونش معيوبه !! .. ويحاول ينسحب بهدوء
بيحس ساعتها ان الموضوع فيه حاجه غلط
للأسف الموضوع مفهوش اي حاجه غلط .. لأن ببساطه حضرتك اللي غلط ,, فكرك اللي غلط ,, مفهومك عن الحياة هو اللي غلط
علشان اتعودت علي الإهانه وقلة القيمة ,, اتعودت علي اللف الكتير .. متعودش ان فيه لسه ناس حلوة ومش بتاعت لف ودران
اسف طبعاً اني قللت علاقة ساميه زي الحب وشبهتها بالشوبينج
بس انا استأذنت من ساميه قبل ماعمل حاجه زي دي …
#الحب_بساطه_مش_تعقيد
ولو مش مصدقني ,, اسألوا طنط ساميه

التعليقات

أخبار ذات صلة

صفحتنا على فيسبوك

آخر التغريدات