وهى البنت ايه غير كائن له العجب ..
يتولد جميل شفاف و باسم
و كل ما يكبر يصير اجمل …
تلعب و تعمل شوشره و خدود بالضحكه منوره …
تنادي بابا ..
تقول شعر …
و تكبر تصير اجمل ..
و الشفايف لهب و الشعر سلوك من الدهب ..
تلبس لبس المدارس القمر يغير منها …
تحضن كتبها ابن الجيران يقول يا بختها ..
يسألها استاذها سؤال علي قدها ..
تقول شعر ..
اصل اللماضه في دمها …
شقية و الشقاوة في كل نظرة تحسها و تكبر و تصير أجمل ..
و في يوم تروح بيت تاني ..
مابقتش لوحدها
بيتها جنة بسببها ….
و جحيم لو فاكر انك ملكتها
تسألها عن حالها و الدنيا ازيها …
تقول شعر
و لما ترضي و عينيها تلمع …
تشوف منها و تسمع …
تعلمك تقول شعر
و لسه هتعيش معاها و تسمع غناها ..اصبر لها …
تكبر و تصير أجمل ..
و مهما جار الزمن تتحمل …
و تسافر لأبعد اماكن … مفيش مسافة تحدها ….
و عن كل حته تروحلها …
تقول شعر
إياك فاكر بين الحيطان حبستها .. ؟
نسيت في اول يوم شوفتها … ؟
لما كانت عينيها بحر و انت بتحلم بمجداف يوصل لها
و اليوم صارت بين ايديك …
صونها و كل يوم قولها …
انك حبيبها لوحدها …
و أنك هتفضل ملكها …
و اوعى تنسي …البنت ام الضفاير و حمره خجلها علي خدها
افتكر دايماً انك حبيتها و عشقتها
و هي زي ما كانت …….
بتقول شعر