جايلك من السما جواب
متخافش يا ابنى من الارهاب
دى مصر الغالية عليا
اللى ذكرتها فى كل كتاب
اوعى تخاف من انسان
انا ربك الحنان
مطرح ما بتكون موجود
عينى عليك فى كل مكان
دية رسالة منى ليك
انا ربك اللى حاميك
انا تملى مادد ايدى
يلاه يا ولدى مد ايديك
رسالة امان بعتهالك
اوعى تخاف مهما جرالك
انا لوحدى بس
اللى هحميك و هغير حالك
خليك يا ولدى قريب ليا
اطمن يا ابنى 100 ال 100
انا مش ممكن اسيبك ابدا
ده انت واحد من الراعية
مهما تكون الصعاب ايه
الخير يا ابنى امشى فيه
سلم امرك دايما ليا
الشر يا ابنى هقويك عليه
انا الخالق رب الكون
متخافش ابدا مهما يكون
اوعى تخاف من مخلوق
انا لوحدى اللى بصون
سيبك من فعل الارهاب
تعالى أقرأ الكتاب
اللى وصى بالمحبة
عمره ما وصى بأى خراب
اوعى يا ولدى تبقى ضعيف
مهما ان كان الأمر مخيف
خليك أقوى من التجارب
كلها هتعدى زى الضيف
اوعى تستسلم لإنسان
انا معاك طول الزمان
خليك دايما متسامح
اوعى تستقوى على غلبان