كفاية بقى تكفير
كفاية بقى استعباط
الموضوع بجد كبير
مالك و مال الاقباط
خلى عقلك فى راسك
كفاية بقى جنون
التكفير مش اختصاصك
أقسم برب الكون
خلى الدين للديان
ولا انت أخدت مكانه
ربنا كبير رحمن
ميرضاش بالظلم عشانه
انت مالك و مالهم
عايز منهم ايه
الناس دايما فى حالهم
بتكفر فيهم ليه
ليه عمال تعافر
أن الشوك يملا الورد
سيب المؤمن و الكافر
لخالق السما و الارض
مالك و مال المسيحيين
انت ليه بتكفرهم
اخواتنا تملى ساكتين
ليه بتقيد نارهم
كفاية سم و ألاعيب
دى الأديان محفوظة
اختشى بقى عيب
الحكاية مش بالوظة
مين أداك السلطان
انك تكفر غيرك
الفتنة أسلوب شيطان
راعى بقى ضميرك
سيب الدين و الملة
لربنا سبحانه و تعالى
اللى خلق النور و الضلة
ميرضاش بالفتنة استحالة
كفاية بقى تجريح
كفاية بقى إهانات
لو انت متدين صحيح
ماتهنش فى الديانات
