نازك شوقى
تركت هدى صلاح ممرضة قسم الجراحة بمعهد القلب رسالة مؤثرة وتوفيت بعدها متأثرة باصابتها بفيروس كوروناوكان نصها كالأتى
《الرسالة الأخيرة》
السلام عليكم
انا هدى صلاح
اولا أنا في الرعاية على التنفس الصناعي CPAP
ومبسوطة أن التليفون دخل لي
وشكراً لكل من ساعد في دخوله وأنا في حالتي دي
علشان أعرف أشكركم جميعاً
رغم إن الكتابة صعبة أوي
بس لازم
اشكركم جميعا
لاهتمامكم وكل ما عملتوه لعلاجي
مبسوطة لما سمعت صوت د راندا
في اسبيكر تليفون مدير مستشفى العزل علشاني
الحمدلله على كل حال
الحمد لله علي قضاء الله .
رغم إني سمعت في مرور الدكاترة النهارده
اني عايشه على ٧ في المائة من الرئة
يعني الأنفاس اللي باقية معدودة
والعد التنازلي لمغادرة الدنيا بدأ
بس الحمد لله
يمكن معرفش أكتب تاني
يمكن ما أعرفش أشوفكم تاني
علشان اشكركم
بس الحمد لله
سامحوني ما ب أعرفش أرد عليكم علشان ال التنفس الصناعي CPAP .
كان نفسي أدخل ابني المدرسة سامحني
يا سيف
يابني الصغير أول سنة السنة دي كان هيدخل المدرسة
كان نفسي ادخله أول يوم في أول سنة له في المدرسة
و أجيب له لبس المدرسة زي إخوته .
مش مهم ما عرفتش أجيب له لبس العيد
معلش يا ابني مش كل عيد لبس جديد علشان الظروف يابني
لكن المدرسة معلش لو مقدرتش والموت خدني منك .
سامحني يا يوسف ابني الكبير خامسة ابتدائي لو مقدرتش المرة دي كمان مفيش كورة ولا نادي . كان نفسه اعيش وأشوفك تبقي دكتور .
وياسين ابني رابعة ابتدائي اكيد لو الموت سابقني
اكيد اخواتي في المعهد هيسألوا عليه في مدرسة ابن خلدون
معلش يا أمي ويا أبي أنا الكبيرة
بس غصبا عني اكيد ربنا موجود معاكم من بعدي
شكرا لكم
