ناشد الإعلامي مصطفى بكري، الإعلاميين المصريين، ببث روح الأمل للمواطنين، حتى نعبر هذه الازمة الاقتصادية . مضيفا خلال تقديم برنامج (حقائق واسرار) عبر فضائية (صدى البلد) :” مينفعش نقع فريسة للازمة ، او نسيب الناس في حالة احباط مستمر، لان الاحباط كارثة . مشددا :” المصريين شعب عظيم مستعد يتحمل ، دا شعب هزم النكسة . لافتا :” إحنا اتربينا واحنا صغيرين على البتاو والمش والجبنة و(الشلولو- ملوخية ناشفة بالملح والليمون) ، واقول لكل مصري تحمل لان بكرة هتقف على رجليك ، لكن في حال استسلمت يبقى كدة ضعنا . واثارت تصريحات بكري غضب عدد كثير من المصريين ، الذين راوا فيها مطالبة بمزيد من التقشف. وعلق حساب :” طبق المش بيتباع في السوبر ماركت ميكملشي ٣٠٠ جرام بـ٢٢ جنيه . وكتب حساب اخر :” انت حضرتك يا استاذ مصطفى تعرف كيلو المش بكام ؟ تعرف اللبن إلى كان بيتشحت للجيران على ايامكوا بكام ؟ تعرف تكلفة العيش الفلاحى إلى بيتعمل في البيت بكام؟ تعرف بندفع كام كهربا فى الشهر؟ تعرف انهارده لما تحب ترضى اطفالك بدلهم كام في اليوم علشان ميحسوش بالعوز والنقص كام؟ حضرتكوا فين من بدرى تعرف انهارده لو واحد عايز يجوز بنتوا وكبر في السن ومعدش يقدر وكان شايله قرشين يجهزها بيهم محتاج عليهم قد ايه؟ انتوا مش حسين بالناس الناس اتسحلت ومحتاحين حتى اعتراف ببعض الأخطاء وخطه زمنيه لتصحيح الأوضاع وطمئنة الناس.
