قال الرئيس عبد الفتاح السيسي :”والله العظيم المصريين أثبتوا خلال الـ10 سنوات الماضية أنهم على قدر المسئولية، حيث قدموا شهداء ومصابين“.
وأضاف الرئيس السيسي خلال كلمته بالمؤتمر الوطني للشباب في الإسكندرية: “عمرى ما قلتكم كلام معسول إن الأمور هتكون خضرا وعندى صفايح العسل والزبدة، ولكن قلت البلد محتاجة شغل من نار على طول“.
وتابع الرئيس السيسي:” قلت عايزين نشتغل ليل ونهار من الساعة 5 صبح وقمت أنا 5 الصبح وأنتم ماقمتوش“.
وقال الرئيس عبد الفتاح السيسي، إن ما تحقق بالنسبة لظروف مصر وإمكانياتها دفع كثير من الدول لسؤالنا عن كيفية تحقيق ذلك، رغم أن ظروف الدولة لا تسمح بأن تفعل ما تحقق.
وأضاف الرئيس السيسى :”الموضوع كله كان أفكار.. العاصمة الإدارية بدأت فكرة، وبدأنا تعظيم القدرات، وأدخلنا الميكنة، كى تكون الدولة المصرية في مستوى إدارى متقدم“.
وشدد الرئيس على أن الدولة المصرية لم تنفق جنيها واحداً من الموازنة فى مشروعات العاصمة الإدارية، مشددا: ” مادفعناش فى العاصمة، وهل دفعنا جنيه من الموازنة فى العلمين؟.. والله العظيم ما خدنا جنيه من الدولة “.
وتحدث الرئيس عبد الفتاح السيسي عن الأوضاع الخاصة بالدولة المصرية عقب ثورة 25 يناير قائلا: “اللى عمل الانتخابات وجاب الناس؟.. هل أنا اللى جبت الناس دي.. ولا أنتم.. واتعملت حالة افرزت حالة والدولة فكت والأساس اللى كان موجود قبل كده.. مبقاش موجود وعملنا انتخابات والبرلمان جاب اللى انتوا شفتوه ومرضتوش ليه وبعد كدة عملتوا انتخابات رئاسية وجبتوا اللى انتوا شفتوه يعنى خراب في خراب“.
وأضاف الرئيس السيسي خلال كلمته فى المؤتمر الوطني للشباب فى الإسكندرية: “عشان تتخلص من الخراب ده عشان مشوفتش تداعياته.. وربنا سلمها عليك جاى تطلب كل حاجة كاملة وكأن البلد مكنتش في أزمة كبيرة جدا “.
وتابع الرئيس السيسي :”احنا اتكلفنا 80 مليار جنيه بعد أحداث 25 يناير غير الإرهاب، والاحتياطى بتاعك خلص خلال سنة ونص اللى قعدت 15 سنة و20 سنة تكونوا .. وانت في 25 يناير وحتى الانتخابات خلصت عليه“.
نقلًا عن موقع اليوم السابع
