اختارى صح فى اختيارك لشريك الحياة خلى اختيارك ذكى لأن الأختيار ده بيكون متاح ليكى مره واحده لطول العمر ،
اختارى حبيبك يكون الحبيب اللى يحس بيكى من غير متتكلمى وقبل ما تتكلمى تلاقيه فاهمك من عينيكى وحضنه هو مكان الراحه ليكى
اختارى حبيبك اللى هيكون أب لاولادك اللى هيربيهم تربية سليمة وهيكونو نسخه منه لما يكبرو اختارى حبيبك يكون الأخ اللى معاكى فى كل الأوقات جايز يختلف معاكى لكن مش ممكن يبعد عنك ابداً
اختارى حبيبك يكون الأمان والحماية اللى بتشوفيهم وبتُشعرى بيهم بمجرد وجودكم مع بعض اختارى حبيبك اللى يكون سندك ومعين ليكى زى ما انتى كمان بتساعديه وقت الشده تشدى على إيديه
اختارى حبيبك اللى تقدرى تفتخرى بيه وسط كل الناس وفى كل مكان اختارى حبيبك اللى تبقى فرحانه ومبسوطه معاه وانتم مخطوبين وفى بداية الجواز ولأخر العمر
اختارى حبيبك الغنى بالقيم والمبادى مش اللى معاه فلوس وبس، الفلوس مهمة اه لكن مش هيا الأساس ،
اختارى الحبيب اللى يقربك من ربنا انتى وأولادك فى المستقبل ويكون قدوة ليهم أختارى تعيشى مع حبيبك فى بيت متواضع بس مليان سلام وحب وسيبك من القصر الكبير والشقة الواسعه اللى مفيهاش حب ،
اختارى حبيبك يكون الصديق اللى يسعدك وتقدرى تخرجى معاه وتتصورى فى كل المناسبات وانتى الفرحه بتنط من عينيكى مالكيش دعوة بكلام الناس الناس متعرفش ظروف حد الناس مش هتساعد حد الناس مش هتحس بيكى الناس مش هتعيش مكانك –
كل واحد فى الحياة له ظروفه. انتى اكتر حد تختارى لنفسك انتى اكتر حد مسؤله عن قراراتك وبإيدك تختارى اللى تعيشى معاه فى ” حب ” ممكن يكون فى بعض الخلافات وممكن يكون فى بعض التحديات اللى هتقابلكم لكن “بالحب” هنتفاهم وهنتحمل وهيبقى فى تكامل واتزان والحياة هتكمل وهنقدر نعيشها حلوه.
واوعى تختارى مظاهر كدابه، او فلوس وتعيشى مجرد خدامة تطاطى علشان الفلوس أوعى تختارى زوج علشان بس كلام الناس وسنك كبر وهيقولو عانس أو عى تختارى واحد بيشرب ولا بيسكر وعايش بدون هدف وتقولى مع بعض هنتغير..
لا مفيش حد بيغير حد لأن ببساطة التغيير بيكون نابع من داخل الشخص نفسة أوعى تختارى حد والسلام وترضى بيه علشان انتى لسه خارجه من تجربه وعايز تنسى مفيش حد بننسى بيه حد وبعد كده هتفوقى وتندمى ندم عمرك قبل اختيارك فكرى واسرحى بخيالك بعيد فى بكره هيكون شكلكم أزاى واما تخرجو هتخرجو ازاى وهتربو عيالكم أزى وهتعلموهم أية اختارى صح
ابرام تاوضروس كاتب ومحاضر ومدرب تنمية بشرية –
