كترت اوى الشكاوى اللي بتوصلني بسبب الخدام و بعض الكهنة و أبناء الكهنة و تعاملاتهم و أساليبهم مع الشعب داخل الكنائس .. السنة اللي فاتت اتكلمت و ناقشت القضية دى في مقال تحت عنوان ” انا تركت كنيستي بسبب الأب الكاهن ” و رعاة يرعون أنفسهم و ضل غنمي و الخ بالبحث في جوجل تجدوا كل هذا ..
و شكاوى كتير تصف بعض الآباء الكهنة و هنا أؤكد بعض الآباء و ليس الكل انهم اعتبروا الكنيسة ملكية خاصة و حكر و وسية و عزبة لهم و لابنائهم و خدام و حاشية يلتفون حولهم و أخذوا منها صناعة السبوبة و التجارة باحتراف و خاصة لو كان كاهن مشهور .. المهم الناس تعبت و فاض بها الكيل .
و لكن عاوز اقول حاجة مهمة انا كنت عشت في اسيوط أربع سنوات متواصلة لأن كانت دراستى هناك حسب مكتب التنسيق في جامعة اسيوط و افخر إننى كتبت سابقا انا أنتمي الي هذه المدرسة من الآباء كتبت الكثير من المقالات عن انتمائي الي مدرسة عمالقة الأرثوذكسية و أساقفة لا يرتدون القلنسوة الرهبانية الخ .
مدرسة متى المسكين الذي هرطقوة و وصفوة بالهرطوقي ! مدرسة الانبا اثناسيوس مطران بني سويف و البهنسا الذي تمت رسامتى علي يدية شماس برتبة ابسالتس و و أخيرا مثلث الرحمات نيافة الانبا ميخائيل مطران اسيوط . أيضا بالبحث علي جوجل ستجدون كل هذا علي أكثر من جريدة و موقع الكتروني ..
أما بخصوص قضية العزبة و الوسية تعالوا احكيلكم الانبا ميخائيل قال اية . ايام ما كنت في الجامعة في اسيوط كان فية خدمة قري و في الحقيقة و بالصدفة و بدون ترتيب قابلت نيافة الانبا ميخائيل و قولتلة يا سيدنا الناس هنا تعبانة جدا و فية كهنة بتتعامل فقط مع الناس الاغنياء و الناس الفقراء البسيطة في تجاهل تام و الاسوء من كدا اولاد الكهنة او بناتهم بيتعاملوا مع الناس في منتهي التعالي و منتهي قلة الزوق و أكن أبوهم الكاهن دا مش خادم الشعب و لا راعي لهم اكنة الآلة الموجود في هذا المكان و الأغرب ان اولاد الكاهن مع بعض الخدام عاملين حلقة او سور من نار حولة و ممنوع الاقتراب دا حتي في ساعة العظة.. لو مافيش محسوبية او مش من الناس المقربين و الأغنياء اتفضل اترمي ورا قدام محجوز مافيش أماكن !! اية اللي بيحصل دا يا سيدنا .. !!
عجبني اوي اوى اوى رد سيدنا نيافة الانبا ميخائيل. قالي بص يا نادر عاوزك تفهم حاجة مهمة اوى .. أنت عارف يا نادر” فلك نوح ” قولتلة طبعا يا سيدنا قالي عارف قصة الفلك كويس” قولتلة طبعا … قالي ” “اهي الكنيسة دى بقي زى فلك نوح بالظبط ” ازاى يعني يا سيدنا !! اجولك ازاى .
اسمع .. الكنيسة زى فلك نوح يعنى هتلاقي فيها جميع الأشكال و جميع الصفات .. هتلاقي فيها الحمامة الوديعة و الحمامة الحسنة و هتلاقي فيها الثعبان و هتلاقي فيها الأسد و هتلاقي فيها العقربة و هتلاقي فيها الأرنب الجبان و هتلاقي فيها الدفانة .. عارف ياد انت اية الدفانة دى ولا عمال تهز دماغك و بس ؟ لا دى مش عارفها يا سيدنا هى اية الدفانة دى !! الدفانة دى أخطر و أشد من العقربة تطلع تلدغ لدغة الموت و تدفن نفسها في نفس اللحظة و ترجع الجحر .
المهم انك لازم تتعلم ان الكنيسة دى فلك نوح و افهم ان اللي هيخرج من الفلك و مش هيتحمل يخسر حياتة الأبدية عشان خاطر الدفانة و الثعبان لكن ثق أن اللي جمع كل هذا داخل الفلك قادر ان يحمي الفلك من الهلاك الي النهاية و نصلي و نقول دايما #يارب_سلام
