بقلم : جوزيف العرقاني
مين فينا ماحتجش زقة
ومين ماطلبش يشلوله الشنطة
مين فينا ما اتعكّزش؟
واحتاج اللي يشرحله عشان ماركزش
مين فينا لما اتلوى
ورجله جات ف الخيّة
وف النار اتكوى
ما احتجش لكوباية ميّة!
مين فينا يقدر يعيش وحداني
ويقول انا واحد ومش عايز تاني
مين فينا؟
كلنا محتاجين لبعض
كلنا واقفين على نفس الارض
اسند اخوك
وساعد اللي يحتاجوك
وافتكر انك عكاز محتاج يتعكز
تزق انهاردة وبكرة تحتاج زقة
واسأل نفسك تاني:
مين فينا ماحتجش زقّة؟
