من كم يوم مجموعة اصدقاء اعزاء راحوا زاروا قداسة البابا في المقر
وقعدوا معاه فترة طويلة واتناقشوا في امور كتير
وطبعاً كانت مبادرة هايله من قداسته انه يتواصل مع الشباب
لان فيه بعض الشباب بيتهم قداسته انه مش عارف يحتويهم ولا يسمعهم وغيره من التلميحات المشابهه لذلك
ولفترة قريبة كنت واحد منهم
بعدها نزلت بوست بقول فيه اتمنى المقابلات تكون سهله ومتاحه للجميع ، ومش لفئة معينه على حساب فئة اخرى
وده لاني شوفت بعيني اكتر من مرة ناس بتقدر تدخل تسلم على قداسته وناس تانيه بتتمنع ، واتكلمت بمنتهى الصراحه والوضوح
وقولت ان البابا هو بابا الكل ومن حق اولاده يقابلوه وبدون اي قيود او وسيط
في يومها حصل استجابه غير عادية ولقيت البابا بنفسه بعتلي رساله وبيقولي انه منتظر يقابلني وبدون اي قيود
وبعدها سيكرتارية البابا كلمتني علشان ترتب الميعاد
وبالفعل ، قابلت قداسته انهارده
حسيت اني قاعد مع شخص كنت ظالمه جدا ، بسيط وبشوش وحكيم وذكي جدا وعارف كل دبه بتحصل حواليه ..
دمه خفيف وبينتبه لكل كلمة بتتقال ، وابتسامته المميزة مافارقتش وشه
ولما اديتله الكتب هدية لقيته بكل محبة بيتصور بيها لوحده وبنفسه وبدون ما اطلب وبيقولي الصور دي هاتعملك دعاية حلوة بس ليا نسبة من المكسب 
اتصور بيها رغم انه عارف ان ممكن كتير يصطاد في الماية العكرة
لكن ماهتمش بده علشان يفرح ابنه 
❤❤
ولما سألني عن اسمائها
قولتله الاول مرار طافح ، والتاني ايام صودا
قالي بلاش تقول اسم التالت 
😂😂
حتى لما جيت اتصور معاه سيلفي والكاميرا علقت
ضحك وقالي شكلك خايب في السيلفي ، هات التليفون واقف ورايا واضحك .. وقام مصور هو ❤
مقابلة اكتر من تلات ساعات محستش فيهم لحظة اني قاعد قصاد بطرك اكبر كنيسة في العالم .. بسيط جدا على عكس ما الميديا بتظهر
ورغم ان المقابله دي مكنتش اول مقابلة تجمعني بقداسته ، الا اني حسيت فيها اني اول مرة اعرفه ، لان لغة الحوار عليها عامل كبير
عنده افكار كتير جدا ايجابية اتكلمنا فيها
وناقشنا اكتر من موضوع
١- السبب وراء الغاء جميع المؤتمرات والرحلات
وكانت الاجابة بسبب دواعي امنية تم تحذيره منها من خلال الأمن
وسيدنا قال انا مش” خايف من ” .. لكنه خايف على
مش خايف من الأرهاب لكن خايف على اولاده
بيقول بمجرد التفكير ان اتوبيس اطفال يتضرب ، ده بس بيوجعلي قلبي
٢- بعص الكهنة الغير قادرين على حل المشاكل واحتواء الشباب
وكانت الإجابه انه بدأ ينظم دورات كتيرة تشبه المشورة والتنمية البشرية مكثفه للاباء الكهنة بقيادة كهنة مميزين وعلى رأسهم القمص داود لمعي ، وبيتم دعوة جميع الاباء لحضورها لتغير الافكار العجوزة واستبدالها بأفكار شبابيه تلبي احتياجات الشباب
بخلاف ان في الاديرة بيتم تعليم الكاهن اللي تحت التدريب كل طقوس الكنيسة واستلام الالحان بالاضافة الي دروس مكثفه من شيوخ الرهبان وغيرهم عن كيفية حل المشاكل اللي ممكن تواجهه في خدمته
٣- اتكلمنا في امتى هانحس بالانجازات اللي مش شايفين منها اي ثمار
وكانت الاجابه لو معانا مليون جنيه وروحنا اشترينا بيهم اكل وأكلنا الشعب
هايفرح انهارده ، لكن هايغضب بكرة لما مايلقيش حاجه ياكلها
لكن لو استثمرنا الفلوس في اكتر من مشروع هنقدر نلاقي اكل انهارده وبكرة وبعده
وكمل وقال الدنيا مكنتش حلوة علشان تقولوا دلوقتي فين الثمار
واللي بيحصل دلوقتي محاولة ترميم وتصحيح امور كتيرة خطأ تمت في الماضي ،
قال احنا فقدنا اهم عنصر لازم يكون فينا وهو ” الرضا ”
صلوا ان ربنا يصلح الامور في اقرب وقت .. صلوا
٤- اتكلمنا برده عن المرأة اللي بتستنى ٤٠ يوم او ٨٠ يوم في حالة الانجاب علشان تتناول ، ودي فترة طويله خاصة لو مكنش عندها ما يمنعها
وكانت الاجابة ان الكنيسة بتدرس الامر ده بدقة دلوقتي وهاتصدر قرارها بشأنه قريب
٥- اتكلمنا عن الايبراشيات الفقيرة والبعيدة واللي مش بيتم فيها اي نشاطات او كرنفالات ودور الكنيسة من الموضوع ده لاحتواء شبابها
وكانت الاجابه ان اسقفية الشباب هايكون ليها تعامل مباشر بكل الايبراشيات لاحتواء ومعالجة كل المشاكل دي
وقال مش كل شئ مسؤلية الاسقف ، لازم الكهنة تساند وتقدم اقتراحات تتنفذ لجلب كل الشباب البعيد عن الكنيسة واحتوائهم
٦- اتكلمنا عن الاساقفة ودورهم في الرعاية
وكانت اجابة سيدنا ان في عهد البابا كيرلس كان فيه ١١ اسقف وفي عهد البابا شنوده حوالي ٩٠ اسقف والان بسبب حجم الخدمة اصبح عدد الاساقفه حوالي ١٢٧ اسقف
منهم لاول مرة ١٢ اسقف عام على مستوى القاهرة واتنين اساقفة على الاسكندرية
واشار سيدنا ان ٢٠% من الاقباط هم اللي فعليا بيفتحوا الكتاب المقدس الورقي في حين ان الاغلب اتجه للداتا شو وبرامج الموبايلات
وده في حد ذاته مؤشر سلبي
وبيقول مش الكاهن هو اللي عليه الدور الكامل انه يدخلك السما
شهداء ليبيا بالرغم من انهم مكنش عندهم كنيسة ، وكان كل فترة بيجيلهم حد يوعظلهم الا انهم كانوا شهداء امناء اقوياء
٧- اتكلمنا عن ظاهرة الصور اللي بتطلع زيت ومنتشرة الايام دي وكانت اجابة سيدنا اقروا انجيل متى اصحاح ٢٤ ايه ٢٤
بخلاف ان قداسته اعترض على شغل الورق اللي تكتب فيه امنيتك وتخلي كاهن يسحب واحده منهم ، قال صلوا وبلاش موضوع القرعه ده ، مش صح اطلاقا ان حياتك تمشيها بالقرعه بدون تفكير ودراسة
٨- اتكلمنا عن الطلاق والزواج وامتى الكنيسة تدي حل بالزواج
وكانت اجابته ان الكنيسة بتبدأ تنظر للموضوع بعد مايتم طلاق مدني عن طريق المحكمة ، والطلاق المدني بيكون بعد مايتم انفصال الزوجين بفترة زمنية محددة ” تلات سنوات لو الزوجان مافيش بينهم اطفال وخمس سنوات في حالة وجود اطفال ” وده اللي الكنيسة مقرراه للمحكمة ،
وبعد الطلاق المدني بيتم دور الكنيسة بالبحث عن سبب الازمة والمخطئ علشان تدي الطرف الاخر ” المهان ” تصريح زواج او تمنع الاثنين اذا كانوا مخطئين
بصراحه فيه نقط كتير جدا اتكلمنا فيها بس الوقت مش ساعفني لان المقابلة تخطت التلات ساعات
مبسوط ان فيه افكار كتيرة مشوشة كنت واخدها عن قداسة البابا
لكني اكتشفت انه مرحب انه يسمعها ويرد عليها بكل محبة ووضوح
مبسوط ان مكتبه ” اصبح ” مفتوح للكل ولكل اسئله الشباب
امبارح انا كنت معارض سياسته وانهارده بعتذر
وانت كمان لو البوست سببلك عثرة ارجوك ماتغلطش غلطتي واقعد معاه الاول واحكم عليه من على قرب
لمست ابويته وحنيته وحكمته وخوفه على اولاده وخفة دمه وقوة ملاحظته …
جربوا تتواصلوا مع قداسته من خلال حسابه على الفيس بوك وان شاء الله تقدروا تقابلوه وتتكلموا معاه
واللي عايز يوبخني بسبب البوست القديم اللي كتبته عنه انا متقبل اي توبيخ وبكل محبة ❤
واخيرا الاعتذار واجب
واحب اقول #انا_اسف_ياسيدنا #البابا_اللي_مانعرفوش
