يااللي عاوزين تتجوزوا ..

الجواز عيشة وعيال ومسئولية..
هيغيَّر أكيد في حياتكوا العادية ..
وكله بيهون بالتفاهم والحنية ..
مش صعبة هيَّ مع إرادة حقيقية ..

جرب تخلي قلبك دايما عليها ..
ودايما إيدك تكون في إيديها ..
خليها تحس إنك سند ليها..
وإوعى يكون عادي يوم تبكيها..

جربي تخلي قلبك دايما عليه..
وإوعي تسيبي في لحظة إيديه..
خليه في عنيكِ ؛ عشان تخدي عنيه..
ولو مالوش عيون يبقى خسارة فيه..

حاسب عليها من قهر الرجال..
ما تسيبلهاش الحمل لوحدها وتزعلها لو مال..
طول ما انت معاها راجل ماتهمش الأموال..
قلب البنت بكلمة حنينة تكسبه في الحال..

حاسبي عليه من كيد النسا..
وشيلي معاه الحمل ، ولو تقلت الأحمال..
خليكِ زينة البنات ؛ أحلى الكلام يتقال..
وخليكِ حنينة ؛ دي الرجالة كلها عيال ..

ما تبقاش بخيل عليها ، وهي مالهاش غيرك ..
ما تحوجهاش ، وتخليها تحتاج يوم لغيرك..
خليها تفرح بيك ، وتفتكر كتير خيرك ..
سهل تخلي قلبها يكون دايما أسيرك ..

ما تبخليش عليه بكلمة حلوة تفرحه ..
إوعي تقولي كلمة وحشة تجرحه..
ولو ما بانش عليه زعله..
أكيد عيونه هتفضحه..

حاسب من لسانك أو معاملة جارحة تقولَّها..
إنها مش مهم ، وهي زي غيرها وغيرها زيها ..
إوعى تنسى إنها صعب تنسى جرحها ..
خليك حنين ؛ تكون لك أنثى حلوة تحبها ..

يااللي اخترتوا الجواز خليكوا قدها ..
دي مش أيام وخلاص هنعيش نعدها ..
ولا بيوت نبنيها وسهل نهدها ..
يااللي اخترتوا الجواز خليكوا قدها ..