كان نفسي أعيش ..

بقلم /أمل فرج

ماكنتش بحلم زمان أكون غنية، وأوزع بقشيش ..
ولا كنت أتمنى كمان ألبس حرير ، وأنام ع الريش ..
ولا اخترت أعيش بنت عز ويجي الزمن ما يعزنيش ..
ولا شغل بالي عمري أكون عالي ، وغيري ما يلاقيش ..
كان كل اللي في خيالي أعيش إنسانة تعرف تعيش ..
وأحس إني غالية على أرض بلدي ، مش ما أساويش ..
اتمنيت لكل الناس كوباية مية نظيفة ، ولقمة عيش ..
اتمنيت ألاقي قلب وفي ، وحضن مخلص ، لكن مافيش ..
كان نفسي أشتغل باحترام وصاحب الشغل ما يذلنيش ..
أحلامي حقوق إنسان ، لكن حلفت الدنيا ما تدينيش ..
عافرت معاها ، واتحديتها ، لكن قالت : ما تحاوليش ..
قولتلها : غوري في داهية دنيا ، و ما تستاهليش..
هتتعبيني ، عارفة ، هتوجعيني ، أكيد ..
لكن تهزميني ؟ لا متحلميش..
ولو هتصالحيني هسامحك ..
لما ترجعي كل إنسان قتلتيه عشان عاوز يعيش..