ماتقولش يا بختهم … مش من حقك تقول يا بختهم ….هقولك الصراحة بيني وبينك …الكلمتين دول إنت بتقولهم لنفسك مش للمظلومين والشهدا …صدقني دي الحقيقة …ده مسكن يسكن الوجع اللي جواك ومش عارف تقاومه تقوم تقول: يا باختهم وصلوا السما ! المشكلة الاكبر إنه مش بس بيبقى “مسكن” ده أوقات بيبقى “مخدر” ….يخليك متقومش بدورك !
أيوة دورك إنت ….بطل بقى و متحاولش تلعب دور ربنا !! إللي من حقه يقول يا بختهم و”نعماً أيها العبد الصالح والامين” ده يبقى ربنا …لكن إنت دورك لما تلاقي ظلم انك تحاول ترفعه هو انت مسمعتش أرميا وهو بينادي “اجروا حقا وعدلا، وأنقذوا المغصوب من يد الظالم” ولا إبن سيراخ وهو بيصرخ ” “انقذ المظلوم من يد الظالم ولا تكن صغير النفس في القضاء” ….أيوة بيقولك: متبقاش صغير النفس… ذي ماسمعتها كدة عايز تقول يا بختهم قولها لنفسك عشان تقوم تلعب دورك لكن مش تقولها للناس كمسكن دورنا كمصريين اننا نتكاتف في مواجهة الفكر المتطرف انك تحاول ترفع الظلم عن أي مظلوم تشوفه ..من أول الطفل اللي مرمي على الارض في الشارع لغاية البنت اللي بيتحرشوا بيها قدامك وانت ساكت دورك انك تصلي وتحب وتتعب لكن اللي أكيد أكيد مش دورك: انك تقعد في التكييف وتقول يا بختهم!!
