يارب الثانوية العامة تموت
صدقني اللي داخل تمتحنه ده مش هو اللي هيحدد مستقبلك ولا حاجة.
إمتحان الفيزيا مش هيحدد إنت هتبقى ناجح في حياتك ولا لأ …..ده وهم ورثناه وعشنا بيه وربنا هيشفيك منه بمجرد ما تخش الكلية.
انك تكون شاطر في علاقاتك ملهاش علاقة بمجموعك وشطارتك في شغلك ملهاش علاقة بمجموعك والاهم بكتير طبعاً إن الفيزا في السفارة ملهاش أي علاقة تماماً بمجموعك (ربنا يكتبهالك ويكتبهالنا ،…،قول معايا أمين)
قالولك حسب مجموعك هيتحدد قيمتك :كلية قمة ولا قاع … صدقني مفيش حاجة أصلاً اسمها كلية قمة في تعليم أقرب للقاع.
ركز ابذل أقصى مجهودك عشان توصل لاختيارك إنت مش إختيارهم ليك.
اتعب ومتخافش، ربنا مش هيضيع تعبك بس أهم حاجة متضيعش إنت سلامك
إختار اللي بتحبه وهتنجح فيه ..كسر القيود …اتعلم لغة ومهارة إستخدم موهبتك.
أنا عارف انك مش مصدقني بس إسأل اللي في كليات هيقولولك واللي إتخرجوا هيقولولك أكتر إن مستقبلك في أيد ربنا وفي اجتهادك طول عمرك مش في ورقة إمتحان بكرة.
اطمن ومتخافش
